Jerusalem-a UNRWA titawp dawn

Jerusalem mayor Nir Barkat chuan khawpui chhunga Palestian refugee te chungchanga dawt sawi ṭhin tihtawp a nih theihna turin Jerusalem-a United Nations agency for Palestinian refugee chu an titawp dawn tih a sawi.

Nir Barkat chuan East Jerusalem-a United Nations Relief and Works Agency (UNRWA) hnuaia school, clinic, sports centre leh service dang siamte chu Israel thuneitute kutah hlan chhawn a ni dawn tih a sawi. Hlan a ni hun tur tak hi sawichian a ni lo a, mahse zirlai 1,800 vel awmna school-te chu school year kal mek tawp hunah khar an ni dawn a ni.

Barkat-i chuan US-in UNRWA tana kumtina sum a pek ṭhin, dollar maktaduai 300 chu a pe chhunzawm tawh dawn lo tih a sawi avangin he thutluka pawh hi an siam zui ve niin a sawi. UNRWA chu dan loa khawpui chhunga thawk leh, Israel dodal leh huatna chawk tho zawnga thilti ṭhinah a puh bawk.

Thuchhuah siamin Barkat-i chuan, " Palestinian refugee-te harsatna neih chungchanga dawt sawi ṭhin tihtawp nan leh, ram chhung ngeia dik lo taka thuneihna siam an tumna chu kan titawp dawn a ni", tiin, school leh clinic te chu Israel licence nei loa din an ni tih a sawi.

Israel ram din tuma beih a nih ṭuma Palestinian mi 700,000 vel zet hnawhchhuah an nih hnuah kum 1949 khan UNRWA hi din a ni. He agency hian West Bank, Gaza Strip, Jordan, Lebanon leh Syria rama Palestinian refugee te chhawmdawl hna thawkin, zirna, healthcare leh social service hrang hrangte a pe a ni. Kum 10 chuang zet Israel-in inkalpawhna a dansak avangin Gaza Strip-a cheng mi maktaduai hnih zinga a zahve aia tam chuan agency puihna hi a ring bawk.

Hetihlai hian Israel chuan UNRWRA in refugee a chhiar dan hi sawiselin, Israel ram din a nih dawn vanga tlanchhiate thlah chhawng zel chu refugee status hi an pe chhunzawm zel niin a sawi. Israel Prime Minister Benjamin Netanyahu pawhin UNRWA chu refugee nihna dik tawk lo chawilar tumah a puh a, UN refugee agency-a a mawhphurhna neih pawh laksak a ngai a ni, a ti.