New York-a JFK Airport chei ṭha dawn

New York-a John F. Kennedy International Airport chu dollar tluklehdingawn 13 sengin chei ṭhat a ni dawn a, terminal thar pahnih siam belhin, kum khatah khualzin a thlen theih zat chu maktaduai 15 velin a punbelh thei dawn a ni.

Terminal thar siam tur hian airport zau zawng chu square feet makatduai liin a tihzau belh dawn a, gate hmasa zawk hi kum 2023-ah hawn hman tum a ni a, project hi kum 2025 ah thawh zawh hman tum a nih thu official-ten an sawi.

Airport cheiṭhatna tur senso dollar tld 13 zinga 90% hi private investment aṭanga hmuh tur a ni bawk.

State governor Democrat Andrew Cuomo chuan thuam ṭhat a nih hnuah JFK chu '21st century transportation hub'-ah siam a ni dawn tih sawiin, khawvela airport ṭha ber berte a el pha tawh dawn a ni, a ti.

Kum 2016 chhung khan JFK a khualzin lut leh chhuak hi maktaduai 59 an tling a, US-a airport lun lamah pangana a ni pha a ni. New York khawpuiah hian mi maktaduai 8.5 an cheng a, America rama khawpuia mi cheng tamna ber a ni.

Kum 1948 khan airport hi hawn a ni a, kum 1963-a president John F. Kennedy thah a nih hnuah khan a hming chawiin airport hming hi thlak a ni.