US Supreme Court Justice atan Brett Kavanaugh lalut

US President Donald Trump-a Supreme Court nominee, Brett Kavanaugh chu liberal Democrats lamin nasa taka an dodal chungin Senate chuan a pawm ta a, Inrinni khan Supreme Court Justice atan rinawmna thu tiamtira lakluh a ni.

President Trump-a Supreme Court nominee hi Senate-in a ngaih-tuahnaah member 50 in an thlawp a, hetihlai hian a duh lo lamah vote 48 a tla thung.

Supreme Court Justice atan Kavanaug rawt a nih chungchangah hian mipat hmeichhiat lam hawia mawi lo taka chea puhna a awm avangin dodaltu tam tak an awm a, FBI chuan he puhna hi a chhui hnuah senator-te chuan President-in a rawtna hi pawm tlak niin an ngai ta a ni.

Senate-in Kavanaugh a pawm thei ta hi President Trump atan pawh hnehna ropui tak anga ngaih a ni. Senate-in Kavanaugh chungchanga vote an lak hma hian Washington-ah mi tam takin duh lohna lantirin kawng an zawh a ni. Vote lak lai pawhin public gallery aṭangin mi ṭhenkhatin an lungawi loh thu pawh an lo auchhuahpui bawk.

Kum 53 mi, Brett Kavanaugh hi Inrinni tlai khan Supreme Court-ah Chief Justice John Roberts-an rinawmna thu tiam tirin a lalut a, justice chawl ta Anthony Kennedy a thlak dawn a ni.