Israel PM nupui sorkar sum hmanga puhna ngaihtuah

Israel Prime Minister Benjamin Netanyahu-a nupui, Sara Netanyahu chu PM official residence-a ei tur leina man atana sorkar sum hmanga puh anih chungchang chu nimin khan court-ah ngaihtuah a ni.

Prosecutor-te chuan PM nupui hian PM official residence-ah hian ei rawng-bawltu an awm lo tia sawiin,ei tur an order mante chu sorkar sum a lo pe ṭhin a, kum 2010 -2013 chhung khan hemi atan hian dollar 1,00,000 zet a lo hmang niin an sawi. Heng ei turte hi Jerusalem-a sumdawng lar tak te, Italian restaurant, Middel Eatern grill joint leh sushi dawr aṭang tein a order ṭhin a ni. A thubuai hi July thla khan ngaihtuah tura tih ni mah se, sawn hlat a ni.

Kum 59 mi, Sara Netanyahu chuan an puhna hi thu dik lo nia sawiin, thil tih dik loh a nei lo tih a sawi thung. Sara Netanyahu-i hi a staff te chunga mawi lo taka cheah puh a ni tawh bawk a, kum 2016 khan court chuan PM te nupa chunga mawi lo taka che ṭhina puhtu, an hnathawktu hlui chu dollar 47,000 pe turin a lo ti tawh bawk.