Bangladesh PM hlui damdawi-inah dah

Bangladesh prime minister hlui leh Bangladesh Nationalist Party (BNP) chairperson, jail-a tang mek Khaledia Zia chu Inrinni khan court thupek angin Dhaka-a sorkar damdawi-inah dah a ni.

PM hlui Zia-i hi eiru-a puhna thubuai ngaihtuah mek a ni a, kum zabi 19 hunalaia Britain sak tan-inah dah a ni. Kum 73 mi, Zia-i hian tunhnaiah court-ah a hriselna ṭhat loh thu a lo sawilang tawh a, a kut leh ke-a a hriatnate te chu a hloh ṭan niin a sawi. Hei vang hian Bangladesh High Court chuan Zia-i hi Bangabandhu Sheikh Mujib Medical University (BSMMU) a dahlut tur leh, a enkawltu tur medical team siam turin a ti a ni.

Kumin February thla khan Zia-i hi eiruk thubuaiah thiam loh chantirin kum nga tang tura hrem a ni. Thiam loh chantir a nih vang hian amah thlawptu leh police te inkarah buaina nasa tak a chhuah zui phah a ni. May thla khan bail-a chhuah phalsak a ni a, mahse thubuai dang eng esmaw zat a la neih avangin jail-ah hian a awm chhunzawm zel a ni. Zia-i hi fahrahte enkawlna tur sum tichingpenah puh a ni a, mahse an puhna hi thu dik lo, politics lama an beihna niin a sawi thung.