New Zealand truck khalhtute'n Covid kaihhruaina duh lohna lantir ve leh

New Zealand-a truck leh campervan khalhtute chuan Covid inkhuahkhirhna leh vaccine lak ngeina tur dan siam duh lohna an lantir ve leh.

Canada rama trucker-te'n Covid kaihhruaina dan siam duh lohna an lantir hnuah New Zealand trucker-te pawhin an hnung zuiin lungawi lohna lantir ve leh a ni.

New Zealand trucker-te hian Wellington-a Parliament kawtah Thawhlehni aṭang khan kawngpui an dangchat. "Kan zalenna min pe let rawh u," tih leh "Remtihna ni loin tihluihna a ni," tih thuziakte kengin, lirthei 100 chuangte chuan parliament building, The Beehive kawtahte lungawi lohna lantirin an kalkhawm a ni. Lirthei dang 100 chuangte chuan khawpui lun laiah horn hmet riin kawng an zawh bawk.

Wellington-a nawrh huaihawt hi boruak muanawm tak hnuaiah neih a ni a, police-te pawhin man emaw, thil pawi thleng lian tham emaw a awm loh thu an sawi.

New Zealand prime minister Jacinda Ardern chuan lirthei khalhtute nena inbiak tumna a neih loh thu sawiin, New Zealand mipui tam zawkte chuan sorkarin vaccination programme a kalpui chu an thlawp thu a sawi. "New Zealanders zinga 96% te chuan vaccine an la tawh a, venhimna ṭha zawk min pek avangin khuahkhirhna nep zawk nen kan khawsak theih phah a ni," tiin Radio New Zealand kaltlangin a sawi.

Sorkar chuan sector hrang hrang -health, law enforcement, education leh defence lama hnathawkte chu Covid vaccine la vek turin a ti a ni. Mipui zingah pawh hian pass system hman niin, restaurant, sport event leh sakhaw thila an kal duh a nih chuan vaccine an la tawh tih finfiahna hi an neih a ngai bawk a ni. Public transport, supermarket, school leh health service lamah erawh ngaihhnathiam an ni.

Canada rama truck khalhtute chuan sorkarin vaccine lakna tur dan a siam duh loin an ram khawpui, Ottawa-ah kar khat chuang lungawi lohna lantirin "Freedom Convoy" an nei tawh a ni. Kawngpuite dang a, nunphung an tihbuai avangin Ottawa khawpuiah hian state of emergency puan a ngaih phah hial tawh bawk.