President Biden-a'n Russia a vau leh

US president Joe Biden chuan Thawhṭanni khan Russia vau nawn lehin, Ukraine a run a nih chuan European gas pipeline pawimawh, Russia-Germanay Nord Stream 2 gas pipeline chu dan chah a ni ve nghal ang, a ti.

US tlawha zin, Germany Chancellor Olaf Scholz nena meeting an neih zawh hnua White House-a joint press conference an neihah he thu hi President Biden chuan a sawi a ni. Hemi hma pawhin Biden hian Russia hi a lo vau tawh bawk a, Ukraine a bei a nih chuan a nghawng na tak a tuar tur thu pawh a lo sawi tawh a ni.

Russia hian Ukraine beih a tum loh thu sawi reng mah se, Ukraine ramriah sipai nuai khat chuang zet a dah avangin khawthlang ramte ngaihmawh a hlawh hle a, Russia hian Ukraine beih hun remchang a zawng reng nin an ngai. Hei vang Russia pawh an vau fo a ni. US hian Kureaine-a an mi leh sa awmte tan Ukraine chhuahsan chu a finthlak tur thu pawh a lo sawi tawh bawk.

Nord Stream 2 gas pipeline hi siam zawh vek tawh ni mah se hman a la ni chiah lo a, hei hi dan sak a nih chuan Russia economy-in a tuar dawn hle a, Germany pawh a nghawng tel dawn a ni. President Biden chuan Russia-in Ukraine lakah sipai emaw, tank emaw hmanga chet a la nih chuan pipeline hi kalpui chhunzawm a ni dawn lo tih a sawi.

Thawhṭanni vek khan France president Emmanuel Macron leh Russia president Vladimir Putin pawhin meeting neiin, Ukraine chungchang an sawidun bawk. Russia president Putin chuan Ukraine beih tumna an nei lo a, inbeih chungchang chu US leh a thurualpuiten an sawichhuak zawk a ni tih a sawi ve thung.