Interpol hotu a bang, China-in chhui zui dawn

International police organistation Interpol chuan an pawl hotu, Chinese Meng Hongwei chu September 25 aṭanga chin hriat loha a bibo hnuhah, Pathianni khan banna a thehlut tih a sawi.

Interpol chuan thuchhuah siamin, Meng hi Pathianni aṭanga Interpol hotu a nihna aṭanga a ban nghal thu leh, South Korea mi Senior Vice President Kim Jong Yang chu acting president-a a awm nghal thu a sawi.

Chinese zinga Interpol president ni thei hmasa ber, Meng hi September 25-a China pana Lyon a chhuahsan hnuah a chin hi hriat zui a ni lo a, kar kalta Zirtawpni khan France official-te chuan a bo thu hi sawiin, China chu Meng dinhmun dik tak sawichiang turin an lo phut tawh a ni. Hemi hnu Pathianni khan China chuan Meng hi an man thu a sawichiang ta a ni.

Meng-a nupui chuan a pasal chanchin hi September 25 aṭang khan an hriah tawh loh thu sawiin, a mobile phone-ah message rawn thawnin chemte lem a thawn tel a, hei hi a dinhmun a him lo tih a hriattir tumna a ni, a ti.

Pathianni vek khan China chuan Meng Hongwei hi thil dik tawk lo tia rinhlelh a nih chungchangah chhui mek a nih thu a sawi a, thamna sum laa rinhlelh a ni tih a sawi. China anti-corruption body chuan an website-ah thuchhuah siamin, National Supervisory Commission chuan dan bawhchhiaa rinhlelh chungchangah Public Security Ministry Vice Minister Meng Hongwei hi a chhui mek a ni, a ti.

Interpol chuan an president a ban tak avangin November 18-21 a Dubai-a meeting neih hunah president thar hi an thlang nghal dawn a ni. Kum 64 mi, Meng hi kum 2016 kumtawp lam khan Interpol hotu atan hian dah a ni a, kum 2020 thleng he dinhmun hi chelh tur a ni. Interpol-ah hian ram 192 an tel a ni.