Brazil President thlan thawh khatnaah Jair Bolsonaro a chak

Pathianni-a Brazil president thlanna neih takah far-right candidate Jair Bolsanora a chak. Mahse president tling tura vote hmuh ngaih zat a hmuh phak loh avangin vote hmu sang pahnihten inthlan thawh hnihna an hmachhawn dawn a ni.

President tling tur hian vote tla aṭangin 50% hmuh phak a ngai a, Jair Bolsonaro hian 46% a hmu a ni. Amah hnaih bertu left-wing Workers' Party candidate Fernando Haddad chuan 29% hmuin, an pahnih hian inthlan thawh hnihna October 28 hian an hmachhawn a ngai dawn ta a ni.

Inthlanah hian centre-left candidate Ciro Gomes chu pathumna niin vote 12.52% a hmu a, Brazilian Social Democracy Party (PSDB) candidate Geroldo Alckmin chuan 4.83% a hmu a ni. President thlannaah hian voter maktaduai 147 chuang aṭangin maktaduai 112 velin vote an thlak a, vote tla hi 79.67% a tling.

Mipui ngaihdan lakah inthlan thawh hnihnaah hian candidate-te hi an inbei tawk dawn hle niin a lang.

Bolsonaro chun inthlan neih takah khan electronic voting sytem lamah harsatna awm lo se chuan President-ah a tling ngei a ring thu leh, inthlan nawn pawh a ngaih dawn loh thu a sawi. Bolsonaro hi Catholic niin, evangelical Kristian-ten an thlawp a ni. Dan leh thupek khauh taka kenkawh duhtu niin, thi tura hremna pek pawh hman leh duhtu a ni.