Suu Kyi-in Rohingya te chungchang chhuina langtlanga kalpui tiam

Myanmar ram hruaitu Aung San Suu Kyi-i chuan Rohingya Muslim-te beih an nih chungchang sorkarin a chhuina chu langtlanga kalpui a tiam.

Human rights vawnhim a nih theihna atana a beihna vanga khawvel huapa pawha hriat lo hlawh tawh tak, Suu Kyi-i hi Myanmar sipaiten an rama Rakhine state-a Rohingya mite laka beihpui an thlak chungchangah a ṭawngchhuah duh loh vang leh, sipaite chetna dem zawnga a thu a sawi duh loh vangin sawisel a hlawh hle a ni.

Suu Kyi hi Japan-ah reigonal summit hmang turin a zin a, Thawhṭanni khan Tokyo-a sumdawngte nena hun an hmanaah Rohingya chungchang hi a sawichhuak a ni. Myanmar hruaitu chuan Rakhine state-a thil thleng chungchangah chona hmachhawn tur tam tak a awm a, boruak muanawm siamna tura tawrh an ngaihnate pawh a hriat thu a sawi a, hemi chungchang hi an ṭhian ṭhate lakah pawh an zep lo tih a sawi bawk.

Myanmar sipaite beihpui thlakna vang hian Rohingya mi nuai sarih chuang chu Bangladesh ramah an tlanchhia a, refugee camp-ah an la khawsa mek hlawm a ni. Bangladesh leh Myanmar sorkar hian raltlante hruaikir an nihna tur hian inremna siam tawh mah se, raltlan tam zawk chu an kir ngam lo a ni.