Variant thar tur chu Omicron aia hlauhawm leh inkaichhawn awlsam zawk a ni dawn : WHO

Covid-19 hri thar, Omicron hri leng vanga khawvel ramte hun engemaw chen an buai hnuah ram tam tak chuan nunphung pangngai an zawh ṭan leh mek a, hetih lai hian mithiamte chuan Covid-19 variant thar lo chhuak leh tur chu a hma zawng aia inkaichhawn awlsam leh hlauhawm zawk a nih theih thu an sawi.

World Health Organization (WHO) epidemiologist leh technical lead on Covid-19, Dr Maria Van Kerkhove chuan hripui leng chuan min la kiansan mai loh tur thu leh kan hmabaka variant lo thleng tur chu Omicron aia rapthlak zawk a nih theih thu a sawi. "Variant lo awm leh tur hi tuna kan hri leng mek hliahkhuh thei khawpa inthazo a ni dawn a, chumi awmzia chu inkaichhawn a awlsam zawk dawn tihna a ni. Tuna zawhna lian tak chu kan hmabaka variant thar tur hi a hlauhawm zawk dawn nge a nep zawk dawn kan hre lo," tiin Dr Van Kerkhove chuan a sawi. Variant thar tur hi awlsam takin kan taksa invenna a paltlang thei dawn a, vaccine hnathawh a tihnep phah thei.

Hemirual hian, vaccine lak a pawimawh zia chungchang sawi zawmin, Omicron chungchanga kan lo hmuh tawh angin vaccine hian natna khirh leh thihna hial lakah a venghim thei tih a sawi. "A hun taka kan danchah theih chuan Covid-19 hri kai hi an tlem phah theih kan beisei. Mahse heng khuahkhirhna karah hian, vaccine la lo emaw taksa chak lo zingah emaw hri darh theihna lian tak a awm tho a ni," tiin Dr Van Kerkhove chuan a sawi.