US-a state tam zawkin mask vuah tura tihna thupek hlip dawn
United States-a school leh inchhunga mipui punkhawmna hmuna mask vuah vek tura thupek siam chu Omicron vanga Covid-19 kai zatin tlakniam lam a pan zel avangin state tam zawk chuan he dan hlip turin thuthlukna an siam.
New Jersey, Connecticut, Delaware, California leh Oregon official-te chuan state chhunga school leh vantlang punkhawmnaah mask vuah vek tura thupek an siam chu hun reiloteah an hlip tawh dawn tih an sawi.
California chuan karleh aṭang khian universal indoor mask mandate tihtawp vek an tum a, hri inkaichhawn awl tak Omicron variant vanga khuahkhirhna an siam zawng zawngte pawh thlahdul vek an tum tih a tarlang.
Connecticut chuan February 28 ai tlai loah school-ahte mask vuah tura an tih chu tihtawp a tum bawk. Delaware chuan March 31 aṭangin mask vuah tura thupek a siam a hlip dawn bawk a ni.
New York Times database tarlan danin, state puma school leh inchhunga mask vuah vek tura thupek siam chu state tlemte chauh an ni tawh.
US-ah hian state hrang hrangah hri kai thar leh hri kai damdawi-in panpui ngai an tlahniam zel. January 15-a a peak a thlen lai ai khan February 2-ah chuan Covid-19 kai thar hi 53.1% in an tlahniam tawh tih U.S. Centers for Disease Control and Prevention (CDC) data chuan a tarlang.
February 2 thlengin US-ah chawhrualin nitin hri kai thar mi 3,78,000 awm ziah ang an ni a, a kar hmasa leh ai khan 37.6% in a tlahniam tih CDC weekly data chuan a puang. Ramchhungah chawhrualin nitin damdawi-ina dahluh ngai mi 16,000 awmin, a kar hmasa ai khan 18% velin a tlahniam bawk.
Hri kai leh damdawi-in panpui tlahniam zel mah se ni sarih chhung chawhruala thihpui zat chu 2,400 niin, a kar hmasa aiin 1.6% in a pung thung. "Thihpui an tam chhan chu data aṭanga thihpui chhinchhiah zat kar hnih aṭanga kar thum vela a hnufual vang a ni," tiin University of California-a Department of Epidemiology chair Zhang Zuofeng chuan a sawi. Tunkar aṭang chuan nitina thihpui zat chu an tlakhniam a rin tawh thu a sawi.
Hetihlai hian, thihpui zat an pun chhanah Omicron variant chu puhin, kum upa lam leh natna benvawn neite tan a hlauhawm zual bik thu Zhang chuan a sawi. Omicron variant hi United States-a hri leng darh chak ber a la nih chhunzawm zel a, CDC chuan February 5 kartawp thlenga ramchhunga hri leng zinga 99.9% chu Omicron kai an nih theih thu a sawi. Omicron subvariant BA.2 chuan 3.6% a hauh thung a ni. CDC chuan rampumah vantlang hmuna inkaidarh theihna chu a la sang hle tih a sawi.
Omicron vangin January thla tir aṭang khan naupang zingah Covid-19 kai an pung nasa hle. January aṭang khan naupang zinga Covid-19 kai hmuhchhuah zat chu maktaduai 4.2 dawn an ni tawh. Hripui len tirh aṭang khan United States-a naupang maktaduai 12 chuangte chuan hri hi an kai tawh tih American Academy of Pediatrics and the Children's Hospital Association report thar ber tihchhuahah a tarlang.