Russia leh Belarus-in military drill nei dawn

Russia-in Ukraine ramria a sipaite a thawn belh avanga khawthlang ramte nena an inkara boruak ṭha lo inmung mek karah, Russia leh Ukraine sipaite chuan ni 10 chhung joint military drill an nei dawn tih an sawi.

US chuan drill neih tur hi a lo ngaimawh leh nghal hle a, hei hi Ukraine chungchanga boruak ṭha lo awm mek tizualtu tur a ni, a ti.

Russia hian Ukraine ramria sipai 1,00,000 chuang a dah hnua ram dangten Ukraine run tum anga an puhna chu a la pha zel a, mahse US leh khawthlang ram dangte chuan Russia hian eng hunah pawh Ukraine bei tura che chhauk thei reng a nih thu an sawi thung.

Kum 2014 khan Russia chuan Ukraine chhim lama Crimea peninsula chhuhin a lo luah sak tawh a ni. Hemi hnu hian Ukraine khawchhak lamah buaina hi a awm chhunzawm reng a, Russia thlawp Ukraine lak aṭanga inlakhran duhtute chuan ram thunun tawhin, buaina chhuak vang hian mi 14,000 vel an thi tawh bawk.

Belarus nena drill an neih turah hian Russia sipai 30,000 vel an tel rin a ni. Belarus hruaitu Alexdander Lukashenko hi Russia president Vladimir Putin nena inhnimhnai tak an ni a. Russia Parliament, Kremlin pawhin kum 2020-a Belarus mipuite'n lungawi lohna an lantir lai pawh khan Lukashenko hi a thlawp tlat a ni. Kremlin thupuangtu chuan joint drill neih tur hi thil pawimawh tak, Russia leh Belarus tana pawikhawihtute hmaichhana beih dan tur zirna niin a sawi.

Russia EU ambassador Vladimir Chizhov chuan Ukraine chungchanga buaina chu ram palite inbiakna hmanga chinfel theih a nih a rin thu a sawi. Belarus-a an sipai awmte pawh exercise zawh hian an awmna ṭheuhah an let leh nghal tur thu a sawi bawk.

White House thupuangtu Jen Psaki chuan, "Military exercise atana an inbuatsaihna kan thlir hian, buaina bengdaih ai mahin boruak ti sosang zawnga hmalakna angin kan hmu a ni," a ti thung.