Egypt chief judge-ah a ṭum khatna atan Kristian judge ruat

Egypt president Abdel Fattah el-Sissi chuan Nilaini khan an rama court sang bera hotu turin a ṭum khatna atan Kristian judge a ruat.

Supreme Constitutional Court hotu atana ruat thar, judge Boulos Fahmy hi kum 1969-a court din a nih aṭanga a hotu 19-na tur a ni.

President Abdel chuan kum 65 mi Fahmy hi dan in a phut angin, sitting judge upa 15 aṭangin a thlang chhuak a ni. Fahmy hian taksa lama harsatna a neih avanga chawl ta Judge Saeed Marei chu a thlak dawn tih Egypt, Shorouk daily-a judicial affairs leh editorial manager Mohammed Bassal chuan a sawi. Fahmy hian kum 2014 aṭang khan court-a General Secretariat hotuah a awm a, Chief judge atana ruat hi Muslim tamna rama mipui tam zawk chuan an pawmpui thu an tarlang.

National Council for Human Rights hotu Moushira Khattab chuan chief judge thar ruat hi politics leh civil rights huanga thil chhinchhiah tlak leh hmalakna ropui tak tiin a fak.

Kum 2014-a Egypt president atana el-Sisi lakluh a nih aṭang khan an rama Kristian tam zawk chuan anmahni venghim theitu turah ngaiin an lo lawm hle a ni. El-sisi hian Coptic Kristian-te a thlawpna lantirin Orthodox Christmas Mass pawh a hmanpui ṭhin. Kristian-te tihchakna tura hmalakna hrang hrang kalpuiin, kum 2018 khan governor atan Coptic Kristian hmeichhia hmasa ber a ruat tawh bawk. Kum tam tak chhung ramchhunga biakin sak khapna chu ṭhiatin Kristiante biakin sak phalna a pe bawk a ni.