Military parade nei turin NKorea a inbuatsaih

Commercial satellite imagery aṭangin North Korea ram chu military parade nei turin a inbuatsaih mek nia a lan thu Washington think-tank, 38 North chuan a sawi. NKorea hian a sipai ralthuam tharte pholan emaw, missile tam zawk a kahchhuah leh emaw rinna pawh a lian hle.

39 North reprot chuan military parade neih ṭhinna, Kim II Sung Square anga siam, Pyongyang-a Mirim Parade Traning Ground-ah sipai za tel chetla lai hmuh a nih thu sawiin, a bul hnaiah bus 240 chuang park a ni bawk a ni, a ti. Mahse sipai ralthuam lam erawh hmuh a ni lo tih a sawi bawk. "Heng thlalak aṭanga a lan danin, kan hma lawkah thil puitham, mi tam tak punkhawmna lam buatsaih an tum ngei a ni," a ti.

Hemi hma hian Seoul-a NK News chuan thu an dawn leh, satellite imagery aṭangin NKorea hian military parade neih an tum ngei nia a lan thu a lo sawi tawh bawk a, Pyongyang chungah jet aircraft thlawk leh training ground-a sipaite kal zir thla pawh hmuh tur a awm thu a sawi a ni.

NKorea hian Kim Jong-un-a pa, Kim Jong Il kum 80 piancham chu February 16 leh a pu, North Korea dintu Kim Il Sung kum 110-na piancham chu April 15 hian lawm an tum a ni. Heng ni pahnihte hi NKorea tan hian holiday pawimawh tak niin, military parade neiin an ralthuam neihte an pholang ṭhin. Kumin hian heng holiday hi eng angin nge an hman dawn tih puang lawk lo mah se, Mirim Parade Training Ground-ah hian sipaite hian hun eng emaw chen chu training an lo nei tawh a ni.