Nikki Haley-in private sector a zawm dawn

UN-a US ambassador Indian-American Nikki Haley-i chuan Thawhlehni khan a hna aṭang a ban thu a puan hnuah private sector a zawm dawn niin President Donald Trump chuan a sawi a, sum tam tak a hlawh chhuah ngei a beisei thu a sawi.

Nikki Haley-i banna hi President Trump chuan pawmsak mah se, amah thlaktu tur chu Senate-in a pawm hma chuan a la chelh chhunzawm dawn a, kumin kumtawp lam thleng a la thawh chhunzawm dawn a ni. President Trump chuan, "Nikki hi kumtawp thlengin a la thawk dawn a ni. Kan ṭhianṭha leh mi ropui tak a ni. A hna thar a thawh a, sum tam tak a hlawhchhuah hma ngei hian a bula hun hman zel pawh hi kan la duh a ni. Engtikah emaw chuan Nikki hi a lo la let leh ngei kan beisei, mi fel leh mi chungchuang tak a ni", a ti.

Haley-i hian a ban chhan tak hi sawilang lo mah se, kum tam tak politics lama hun a hman tawh aṭanga chawlh lak a duh thu a sawi. A ban tum thu hi thla ruk kalta vel khan President Trump pawh a lo sawipui tawh a ni.