Khawvela fish market lian ber hawng leh ta

Khawvela fish market lian ber chu nimin aṭang khan Tokyo-a hmun siam tharah an hawng leh ta.

Fish market thar, dollar tlukleh-dingawn 5 senga siam, Toyosu market hawn tur hi hun eng emaw chen tihkhawtlai a nih hnuah nimin khan an hawng thei ta a ni. Fish market hlui, Tsukiji-ah chuan kar hmasa khan auction hnuhnung ber neih niin, nimin zing dar 5.30 aṭang khan market tharah hian auction neih ṭan a ni ta a ni.

Kum 83 chhung zet an lo hman tawh, fish market hlui, central Tokyo-a Tsukiji hi khualzin tlawhtu an tam thei hle a, sangha chi hrang hrang leh tharlam tak takte zawrh chhuah niin khualzin hiptu lian tak a ni pha hial a ni. Mahse a hmun hi a hlui tawh vang leh a thianghlim tawh loh avangin Toyosu-ah hian sawn a ni ta a ni. Sawn a nih tur hi Tsukiji-a sangha zuartu 80% zet chuan an duh lo a, bazar hlui ṭhiah tum pawh hi an dodal a ni.