NATO Trident Juncture exercise-ah sipai 50,000 tel dawn

NATO-in October 25 leh November 7 inkarah Norway-a Trident Juncture 2018 exercise a buatsaih turah ram 31 aṭangin sipai 50,000 vel an tel dawn niin Norwegian Armed Forces chuan a tarlang.

Cold War hnuah NATO-in exercise a huaihawt lian ber turah hian NATO member ram 29 te an tel vek dawn bakah, an thawhpui Sweden leh Finland ram pawh an tel dawn a, aircraft 150, lawnglian 65 leh sipai motor 10,000 vel zet hman tel a ni dawn. NATO chuan sipai nunchan zirna hun a buatsaih tur hi tu ram emaw, khawi bial emaw bik bitumna tura tih a ni lo tih sawiin, an thawhhona hnuaiah an sipaite chu hun khirh leh harsa takah pawh ṭha taka an thawhho zel theihna tura tih a ni tih a sawi.

Exercise hi central leh eastern Norway bakah North Atlantic leh Baltic Sea chheh-velah leh Iceland leh Finland leh Sweden airspace-ah neih a ni dawn a, US chuan nuclear-powered aircraft carrier USS Harry S.Truman tirh a tum thu a tichiang tawh bawk.