Joe Biden-a'n Ukraine chhuahsan vat turin America mite a ngen

US president Joe Biden chuan Ningani khan Ukraine rama America mi awmte chu Ukraine chhuahsan vat turin a ngen a, Russia-in Ukraine ramria sipaite a dahbelh zel avang leh live-fire drill a neih mek avangin inrunna thleng thut thei dinhmunah an ding mek tih a sawi. Ukraine chungchang avangin US leh Russia inkar buaina hian Cold War hnua boruak a san ber ṭum a tawng chho mek a ni.

US chuan Russia sipai 1,30,000 vel chu Ukraine ramriah indo tura inpeihsa vekin an inkhuar mek tih a sawi. "America mi la awmte chuan an chhuahsan nghal tur a ni," tiin NBC news-in an kawmnaah Pesident Biden chuan a sawi. "Khawvela sipai ngah berte zinga mi nen kan inhmachhawn mek. Boruak danglam tak kan tawng mek a, hun rei lote chhungin boruak a inthlak danglam thei a ni," a ti.

Biden chuan Russia-in Ukraine a run anih pawhin, eng dinhmunah pawh ding sela America mipuite la chhuak turin US sipaite tirh an ni dawn lo tih a sawi bawk.

Russia-in live-fire drill nei tura Belarus lama tank-te an tirh hnuah Biden chuan thuchhuah hi siam zuiin, NATO leh khawthlang ramte pawhin he hmalakna hi an ngaihven hle a, theihtawp chhuaha indona thleng thei pumpelh tura hmalak an duh thu an sawi a ni.

NATO chuan Russia-in missile, heavy armor leh machine-gun keng sipaite thawnchhuak tura an hmalakna chu Soviet Union kehchhiat hnua Europe tana hun hlauhawm ber anih thu a sawi.

Russia hian Bosphorus kaltlangin Black Sea leh Azov tuipui-ahte naval drill nei turin indo lawng paruk a tirchhuak tawh a ni. Ukraine chuan Russia hmalakna chu demin, tuipui lama Ukraine danchah a tumnaah a ngai.

Russia leh Belarus hian joint military drill an neihah sipai eng zat nge tel an sawilang lo a,mahse US chuan Belarus-ah Russia sipai 30,000 vel tirh luh an ni tawh niin a sawi.