New Zealand-a nawrh huaihawtte ni li chhung Parliament kawtah awm tawh

New Zealand sorkarin Covid-19 khuahkhirhna dan khauh tak leh, vaccine lak vekna dan a siam duh loa nawrh huaihawtte chu ni li chhung Wellington-a Parliament kawtah an awm tawh.

Canada rama trucker-ten vaccine la vek tura tihna duh loha nawrh an huaihawt hnuah, New Zealand-ah truck khalhtute huaihawtin lungawi lohna hi lantir a ni ve leh a ni. Police-ten nawrh huaihawt zinga ṭhenkhat pawh man tawh mah se, nawrh an la titawp duh lo a,Wellington-a Parliament kawtah inhawr khawmin, kawngpuite chu truck, car, camper van leh motorcycle hmangin an dang a ni.

Police-te chuan tihluihna hmangin hnawtdarh tum mah se mipuite hi an inkulhna hmun aṭang hian an kalsawn duh lo a, nimin thleng khan nawrh huaihawtnaa tel tur hi an la thlen belh reng a ni. Ningani khan an zinga mi 120 chu police-te chuan an man a, nimin khan mi pahnih chu zu ruih chungchangah an man leh bawk.

Wellington bakah Nelson leh Christchurh khuaah pawh mi tam vak lo chu lungawi lohna lantir hian an pungkhawm ve bawk a ni.

Prime minister Jacinda Ardern chuan nawrh huaihawtte chu kalsawn turin ngen mah se mipuite hian an bengkhawn duh lo a ni. PM Ardern hi kum hnih chhung Covid-19 hri leng vanga buaina lian tham tawk loa an ram a kaihhruai avangin fak a hlawh hman hle a, mahse tun thlenga khuahkhirhna khauh tak a la lekkawh reng avangin mipuite zingah a tla na lo sawt hle. Mipui ngaihdan lak hnuhnung berah pawh Adern duh lotu hi an ṭhahnem sawt hle a ni.