Myamnar sipaiten Union Day vawi 75-na lawm ; Sipai sorkarin mi tang 800 chuang a ngaidam

Myanmar-a sipai sorkar chuan Inrinni liam ta khan Union Day vawi 75-na lawmin, an ram khawpui Naypyitaw-ah military parade an nei.

Union Day pual hian mi tang 814 ngaihdamin chhuah zalen an ni dawn tih sipai hotu lu, Senior General Min Aung Hlaing chuan a puang a, hemi ni tlai lamah tang ṭhenkhat chu chhuah nghal an ni. Kum dangah pawh Union Day leh holiday pawimawh pual hian mi tang ngaihdam an lo ni fo ṭhin.

Sipai sorkar thupuangtu, Zaw Min Tun chuan kumina tang ngaihdam tur zinga a tam ber chu Yangon khawpuia tan-in tangte an ni tih a sawi. Kum khat chuang zet hren tawh, Australian academic Sean Turnell chu chhuah zalen tur zingah a tel em tih a sawichiang duh lo. Australian professor Turnell hi Suu Kyi-i adviser a ni ṭhin a, nikum February thlaa sipaiten civil sorkar thuneihna an hnehchhuh hnuah khan man a ni. Thubuai rip tak, official secret laws bawhchhiaah puh a ni a, thiam loh chantir a nih chuan kum 14 thleng tan tir theih a ni ang.

Union Day lawmnaah thu a sawiah, General Min Aung Hlaing chuan kum 2020 inthlanpui Aung San Suu Kyi-i party, National League for Democracy (NLD)-in hnehna a chan dan chu thil dik lo a ni tih a sawi nawn leh. Ramchhunga hel pawl hrang hrangte pawh sipaite an beihna titawp a, inremna kawng zawnga inbiakna nei turin a sawm nghal bawk.

Mahse tun hnaia Myanmar khawchhak lama sipaite nena inbei fo, Karen National Union chuan inbiaknaah hian an tel dawn lo tih an sawi nghal. KNU thupuangtu Padoh Saw chuan, "Sipaite hian civil sorkar thuneihna an ruksak a, official government an ni lo," a ti. Sipaite thusawi dan leh a taka an chet dan chu a inang lo hle tih sawiin, sipai sorkar chuan an ramah remna leh muanna a awm a duh tak tak lo, tiin a sawi.