France leh Netherlands-ah Covid inkaihhruaina dan duh lohna lantir

Canada rama truck khalhtuten Covid-19 vaccine la vek tura sorkar dan siam duh lohna lantir a, “Freedom Convoy” an huaihawt hnuah an hnung zuiin France leh Netherlands-ah pawh Inrinni liam ta khan Covid inkaihhruaina dan siamte duh lohna lantir a ni ve leh.

France khawpui, Paris-a Champs Élysées-a lungawi lohna lantira pungkhawmte chu police-te chuan hnawtdarh nan mittui tlakna hloin an kap a ni. Paris khawpui laili laia police-te checkpoint siamte pawh nawrh huaihawtte phurtu motor-te chuan an paltlang bawk. Canana rama nawrh huaihawtte tih dan ang bawkin, Paris khawpuiah hian motor horn hmet riin, France flag vai chungin nawrh huaihawtte hian khawpui chhung lut lo tura police-te ngenna chu an pawisa duh lo a ni.

Paris khawpuia nawrh huaihawt dawn vang hian police officer 7,000 chuang duty tir an ni a, khawpui chhunga hmun tam takah checkpoint-te siamin, pungkhawmte hnawhdarhna atan water cannon te pawh an siam bawk. Police-te chuan Paris chhim lamah nawrh hauihawt zinga mi panga an man tih an sawi.

France ramah hian restaurant leh hmun pawimawh dang eng emaw zata kal turte chuan vaccine an la tawh tih finfiahna, vaccination pass an neih a ngai a ni. Hei hi mipuite chuan duh loin, zalenna an duh thu an aupui a ni.

Netherlands ramah pawh an ram khawpui, The Hague-a city centre-ah nawrh huaihawtte hi motor-in an kalkhawm a ni. Motor kalkhawmte hian Dutch sorkar hmunpui, Binnehof panna kawngpui chu an dang a ni. Police-te chuan pungkhawmte hi an kalsawn thuai loh chuan sum chawitir an nih bakah man an ni dawn tih an hrilh.

Dutch press agency ANP chuan pungkhawm zinga mi tam zawk an haw hnuah buaina lian tham vak lo a chhuah zui thu a sawi a, police-ten mi pahnih an man tih a sawi.