Ukraine Preident-in an ram tlawh turin President Biden sawm

Ukraine president Volodymyr Zelensky chuan Russia-in an ram run mai tum ni awma a awm mek karah, Ukraine ram a thlawpna lantira an ram tlawh turin Pathianni khan US president Joe Biden a sawm.

President Biden nena telephone-a an inbiaknaah Zelensky chuan, "Kan ram i rawn tlawh thei a nih chuan, boruak ṭha lo inmung mek siamṭhatna kawngah awmzia a nei ngeiin ka ring a ni," tiin Biden hi a hrilh a ni. Hemi rual hian US-in a thlawpna avangin lawmthu sawiin, eng dinhmun pawh hmachhawn turin an inpeih tih a sawi bawk.

US chuan Ukraine President-in zin tura President Biden a sawm chungchang hi a sawilang lo a, mahse Biden chuan Ukraine ram inrelbawlna leh thuneihna humhalhna kawngah theitawpa an thlawp zel tur thu erawh a hrilh nawn leh tih a sawi.

Russia nena meeting neih duh
Ukraine chuan an ramria Russia sipaite inkulh mek leh boruak sosang zel chungchangah Russia leh European security member-te nena meeting neih thuai a duh thu a sawi bawk.

Ukraine foreign minister Dmytor Kuelba chuan ramria Russia-in sipai ṭhahnem tak a dah chungchanga sawifiah tura an ngenna chu Russia lam hian a la ngaithah zel tih a sawi. Hei vang hian Russia thil tum chungchang chiang taka hriat a nih theihna turin darkar 48 chhung ngeia meeting neihpui an duh thu Thawhṭanni khan a sawi a ni.

Russia chuan Ukraine ramriah sipai nuai khat vel dah mah se, Ukraine run tum nia puhna erawh a la pha zel. Mahse US leh khawthlang ramte chuan Russia hian sipai chakna hmangin Ukraine hi beih tumin a inbuatsaih mek niin an puh a, eng hunah pawh Russia hi che chhuak thei reng a ni, an ti.

Ram 10 chuang chuan Ukraine-a an mi leh sa awmte chu a rang thei anga chhuak turina an lo chah tawh a, Ukraine khawpui Kiev-a embassy staff pawh eng emaw zatin an thiarchhuak tawh bawk. US pawhin darkar 48 chhungin an mi leh sate lakchhuah vek a tum nia sawi a ni.