Truck hmanga kawngpui dan tihtawpna turin Canada PM-in Public Order Emergency a puang
Canada prime minister Justin Trudeau chuan Covid-19 kaihhruaina dan siam duh lohna lantira truck khalhtuten nawrh an huaihawt mek vanga kawngpui dante tihtawp a nih theihna turin public order emergency a puang.
PM Trudeau chuan Canada ram chanchina a vawi khatna atan buaina chingfel tura sorkarin thuneihna zau zawk a neih theihna tur Emergencies Act hman a ni tih a puang. He thupek hi ram pum huap ni loin, a hman ṭulna area bik tan chauha siam an nih thu a sawi zui nghal bawk.
"Dan kengkawhtute tan harsatna hmachhawn tur tam tak a awm a ni," tiin Emergency Act puan a nih chhan chu Canada mipuite himna atan, mipuite hna humhimna atan leh sorkarah rinna an nghah ngam zelna atan a ni tih a sawi. He dan hmang hian mipuite nitin mamawh lamah harsatna a awm lohna turin kawng dangtu truck hnuhsawn theihnate a awm dawn a ni. Infrastructure pawimawh, a bikin ramri leh airport-te nawrh huaihawtute laka venhimna atante hman a ni dawn a, sorkar chuan he dan kengkawh kawngah hian sipaite hmang loin, Royal Canadian Mounted Police-te a hmang dawn a ni.
Truck khalhtu intel-
khawmte hian crowd-funding sites kaltlangin dollar maktaduai chuang an khawnchhuak tawh a ni. Hei vang hian sorkarin ruahmanna a siam tharah hian court order tel loin kawng dan thlawptu mipuite bank account tih-tawp emaw khawih chet theih loh turin bank-te chu thuneihna a pe dawn a, pawisa chheprelh leh helpawl aṭanga ṭanpuina dawn an tihtawp theih nan sum khawn khawm leh cryptocurrencies tihtawp te pawh a tel bawk.
Finance minister Chrystia Freeland chuan truck company, dan loa kawng danna-a inhnamhnawihte bank account pawh khawih chet thei loha siamsak leh, an insurance hren sak thlengin a vau.
Kum 1980 chhoa War Measures Act thlaktu, Emergencies Act hian ramchhunga rikrum thila vantlang khawsak tibuai thei thil(khuarel chhiatna, hri leng), public order (civil unrest) leh ram pum huap emergency emaw war emergency emaw laka venhimna kalpuina tur thuneihna sang chu sorkar a pe thei a ni.