Myanmar sipaite'n Karreni state-ah pawikhawihna nasa tak thlen

Human rights group Fortify Rights chuan nimina report a tichhuahah, Myanmar sipaite chuan an ram khawchhak lam, Karenni state-ah civil mite thatin, mipuite chu inphenna atan an hmang zui niin a tarlang.

Fortify Rights chuan kum 2021, May leh 2022, January inkarah Kayah state tia sawi bawk, Karenni state-ah biak-in, chenna in, raltlante awmna hmun leh civil mite awmna hmun dangte beih an nih dan pawh an lo chhinchhiah tawh tih a sawi. Hemi hun chhung hian sipaite hian civil mi 61 an that a ni, a ti.

Association of Southeast Asian Nations (ASEAN) foreign minister-ten Cambodia-a meeting nei tura an inbuatsaih mek laiin he report hi tihchhuah a ni. Nikuma ASEAN hruaitute leh Myanmar sipai hotuin Myanmar tualchhung buaina tihtawp a nih theihna tura inremna an lo siam chu sipai lam hian bawhzui loin, Myanmar ram chhung buaina chuan ziaawm lam a pan lo a ni.

Fortify Rights regional director, Ismail Wolff chuan, "Myanmar sipaite hian global market aṭanga an lei ralthuam hmangin an ram mite an that mek a, hei hi tihtawp thuai a ngai a ni," tiin UN Security Council chuan Myanmar sipaiten ram dang aṭanga ralthuam an lei theihna hreksak tura hma a lak thuai a ṭul tih a sawi. Hemi kawngah hian ASEAN pawhin a nawr a ngai niin a sawi.

Karenni Civil Society Network pawhin sipaiten civil mite an beih chhunzawm reng avangin, an state mipui nuai thum zinga a zahve aia tam, mi nuai 1.7 vel chuan an chenna in an tlanchhiatsan tawh a ni, a ti.