US-Canada inri-naah ralthuam keng mi 11 man

Canada police-te chuan Thawhṭanni khan Covid inkaihhruaina dan duh loa lungawi lohna lantira Coutts, Alberta leh US state, Montana inkar kawng dangtu zinga mi 11 manin, an ralthuam ṭhahnem tak an man tel sak bawk.

Royal Canadian Mounted Police-te chuan trailer pathum dapin, Coutts-a lungawi lohna lantirtute zingah hian silai leh ralthuam ṭhahnem tak man a ni, an ti. "Heng pawlte hian police te'n kawng dan titawp tura hma an lak chuan beihlet tumna an nei a ni," tiin an sawi. Ralthuam an mansak zingah hian rifle, handgun, body armor, machete leh silai mu ṭhahnem tak a tel thu RCMP chuan sawiin, a hma ni pawh khan tractor lian chi leh semi truck hmanga police car chil an lo tum tawh bawk niin an sawi.

Coutts, Alberta leh Sweet Grass, Montana-a inkalpawhna chu Ottawa-a lungawi lohna kar thum zet lo kalpui tawh an thlawpzia lantirnan mipui lungawi lote hian ni eng emaw zat an lo dang tawh a ni.

Canada rama truck khalhtu, United States ramria lut turte chuan vaccine an lak vek a ngai tih thupek siam chu duh loin nawrh hi huaihawt ṭan a ni a, mahse lungawiloa pungkhawmte hian Covid-19 inkaihhruaina zawng zawng hlip tur leh PM Trudeau-a kaihhruai Liberal government paihthlak thlengin an nawr tawh a ni.