Russia-in Ukraine a rûn a nih chuan Sawhkhawk na tak a awm ang : United States
United States president Joe Biden kaihhruai sorkar chuan Russia sipaite'n Ukraine an run chuan a sawhkhawk na tak an dawn let ve tur thu sawiin ,Russia lamin inbiakna mumal tak neih an duh chuan inpalai tawnna kawng zau tak an hawn reng thu a sawi nghal bawk.
White House principal deputy press secretary Karine Jean-Pierre chuan Thawhṭanni khan US chuan Ukraine chungchanga inepna awm mek chinfel a nih theihna tur kawng chu a ngaihtuah reng a ni tih a sawi bawk. "President Joe Biden leh Russia president Vladimir Putin-te pawh an inbia a, kan thawhpui ram dangte nen pawh Russia sorkar chu kan be reng bawk a ni," a ti.
Russia-in Ukraine ramria sipai nuai khat chuang a dah chuan ram dangte ngaimawh a hlawh hle a, Ukraine run lo turin khawthlang ramte pawhin an vau nasa hle. Hetih lai hian Russia chuan Ukraine run tumna a neih loh thu a la sawi ve reng thung.
Jean-Pierre chuan Russia-in awmze nei zawka hma lak a duh chuan ram palaite inbiakna turin kawng a inhawng reng tih a sawi. President Biden pawhin Russia leh Ukraine chungchang sawipuiin, Britain prime minister Boris Johnson pawh a lo be tawh bawk a ni. Hruaitu pahnihte hian Russia-in Ukraine ramria a sipaite a thuam chak zel chungchang te, Ukraine ram an thlawpna thute an sawidun a ni.
US chu eng dinhmun pawh hmachhawn turin a inpeih a ni, tiin Jean-Pierre chuan a sawi a, "President Biden chuan President Putin nena an inbiaknaah Russia-in Ukraine a beih a nih vaih chuan, US leh a thurualpui ram dangte chuan na takin an chhang let dawn a, Russia in a tuar nasa dawn hle a ni, tiin chiang takin a hrilh a ni," a ti. Biden chuan Ukraine hi a run a nih chuan mipuite tawrhna nasa tak a thlen bakah, Russia dinhmun pawh a chhiatphah dawn hle tih a sawi.
US Defence Secretary zin
chhuak dawn
US defence secretary Lloyd Austin chu Belgium, Poland leh Lithunia tlawhin a zin chhuak dawn tih Pentagon thupuangtu John Kirby chuan a sawi.
Lloyd Austin hian heng ram pathum defence minister-te bakah, NATO hruaitute kawmin, Russia-in a sipai a thuam chak mek dan leh, Ukraine ramria an inkulh dante a sawipui dawn a ni.
Hetih lai hian Russia chuan NATO chu Ukraine leh ex-Soviet ramte member atana pawm lo turin alo phut thung.
Russia-in Crimea military
drill titawp
Russia defence ministry chuan nimin khan Ukraine khawchhak lam, Crimea-a military drill a neih chu tihtawp a nih thu a puang. Ministry hian Russia sipaiten an hmanruate nena Crimea an chhuahsan lai video pawh a tichhuak
nghal bawk.
Russia sorkar chuan Ukraine ramria sipai a dah zinga ṭhenkhat chu hmunpui lamah an kir tawh tih a lo sawi tawh bawk. President Vladimir Putin chuan khawthlang ramte nena an inep mekna boruak siam ṭha turin, US leh NATO nena inbiak an inpeih thu a sawi bawk a ni. Putin chuan indo an duh bik lo tih sawiin, an ramin an dodal tlat, Ukraine-in NATO zawm a dilna chungchang chu boruak ṭha tak hnuaia sawiho a duh thu a tarlang. Ukraine-in NATO zawm a duhna hi Russia chuan an ram himna tiderthawng thei thil nia ngaiin a dodal
tlat a ni.
US leh NATO chuan Ukraine leh ex-Soviet ramte NATO-a telh ve lo tura Russia-in a phutna hi a hmain a lo hnawlsak tawh a ni.