NKorea-in Kim Jong Il piancham an khawpui tharah lawm

North Korea chuan an ram hruaitu boral tawh, Kim Jong Il piancham vawi 80 na chu an khawpui chei thar, Samjiyon City-ah music concert leh halpuah leh halmawite nen an lawm.

Kim Jong Il piancham hi North Korea chuan Dayof the Shining Star tia vuahin, an rama holiday pawimawh ber a ni.

State media, KNCA chuan Thawhlehni khan Kim Jong-un-a pa, Kim Jong Il piancham lawmna hi Samjiyon City-a a lim bulah hman a nih thu sawiin, sorkar official, sipai leh rorellai Workers' Party official-te an kalkhawm a, mahse military parade erawh buatsaih a nih loh thu a tarlang.

NKorea hmarlama awm, "holy land of revolution" tia an vuah Samjiyoin khua hi China ramri leh Mount Peaktu bula awm niin, Mount Peaktu hi Kim chhungkaw chawrchhuahna, tlang thianghlima an ngaih a ni bawk.

Kumtinin Kim Joing Il piancham hi ropui taka lawm ni mah se, Samjiyon-ah erawh an hmang khat hle thung. NKorea ram hruaitu, Kim Jong-un chuan he khawpui hi sumdawnna hmunpui atana siam tumin a chei ṭha a, apartment tam tak sak belin, hotel, ski resort, commercial, cultural and medical facility-te siam thar a ni. Hei hi ramdangten an hrek mek karah ram dangte laka innghat lo a, mahni kea an din theihna tura an hmalakna pawimawh tak a ni. Kim chuan he khawpui hi ṭum eng emaw zat a tlawh tawh a, duhthusam leh tunlai changkanna lantirna hmun tihtein a sawi a ni.

Kim Jong il piancham lawmnaah hian Kim Jong-un chuan a lim hmaah zahna pangpar a dah a, mahse hemi ni puala thuchhuah erawh a siam lo. Senior party official, Ri Il Hwan chuan thu sawiin, an ram hotu hluiin intodelh a ngaih pawimawh dante, he a thuthlung hi chhawm nun zel a ṭul thute a sawi.

US think tank chuan kar liam ta khan satellite imagery aṭanga a lan danin, NKorea hi military parade pui tham tak nei tura inbuatsaih ni thei awma a lan thu a sawi. Mahse Kim Jong Il piancham lawmnaah hian military parade hi neih a ni lo a, ralthuam pholan pawh a ni lo bawk. Halmawi leh halpuahte nen an lawm thung a ni.

NKorea hian January thla chhung khan missile ṭum sarih a enchhin a, April 15 hi NKorea ram dintu, Kim-a pu, Kim Il Sung piancham vawi 110-na a ni a, he hunah hian NKorea hian ralthuam lian thamte a enchhin leh an ring a ni.