Rai laia vaccine lakin hri lakah naute a venghim : US Study

Nuin nau a pai laia coronaviurs vaccine dose kima a lak chuan a fa lo piang chu Covid hri avanga damdawi-in pan ngaih khawp tur chu 60% velin a veng nghal thei niin US Centers for Disease Control and Prevention zirchianna thar ber, Thawhlehnia tihchhuah chuan a sawi.

Rai laia placenta kaltlang leh, nau pian hnua hnute tui pek kaltlangin nauteah hian antibodies hi a siam nia sawi a ni. A hma chuan hei hi ngaihruatna hmanga sawi ṭhin ni mah se, tunah chuan finfiahna mumal tak hmuhchhuah a ni ta a ni.

CDC chuan July 2021 - January 2022 inkar khan damdawi-ina pediatric center-a enkawl naute 379, thla ruk china upa inkarah zirchianna hi a nei a ni.

Zirchianna hi Covid vanga damdawi-in panpui ngai, naute 176 leh Covid vang ni lo natna dang kaihhawih vanga damdawi-in panpui ngai (Nausen 203) ah an nei. "Nausen thla ruk aia naupang an nu ten vaccine an lak tawh chuan Covid-19 vangin 61% vel zetin damdawi-in pan theihna an nei tlem zawk a ni," tiin CDC researcher Dana Meaney-Delman chuan a sawi.

Nausen damdawi-in panpui ngai zinga 84% te chu an nute vaccine la lo an ni. Black leh Hispanic naute zinga Covid vanga damdawi-ina dah ngai an tam bawk. "A tawpah chuan heng nausen kan venhim theihnan nu-in vaccine an lak a pawimawh takzet a ni," tiin Meaney-Delman chuan a sawi.

Nuin nau a pai tirh lam aia a pai rei deuh hnuah vaccine dose hnihna a lakin naute a venhimna chu 32% aṭangin 80% ah a sang chho niin zirchianna hian a tarlang bawk.

"Nau pai aṭanga thla thum chhunga nuin vaccine dose kima a lak hman chuan, a rai chhung ngei pawhin booster vaccine a la leh thei a ni," tiin Meaney-Delman chuan a sawi a, hemi rual hian raipuar tana booster dose pek lo rawt khan a him ber hrih lo tih a sawi nghal bawk.