Yemen mipui mtd 8-te chhawmdawlna tur awm tawh lo maithei

United Nations official-te chuan hun rei tak tualchhung indona thlenna, Yemen ram mipui maktaduai riatte chuan sum awm loh avangin March thla aṭangin chhawmdawlna an dawn ṭhin chu an dawng chhunzawm thei tawh lo mai thei tih an sawi.

UN special envoy Hans Grundberg leh UN humanitarian chief Martin Griffiths chuan UN Security Council hnenah hemi chungchang hi hrilhin, January thla UN aid programme lian zinga hmun thuma ṭhena hmun hnih chu khar an ni a, hetih lai hian Yemen ram chhunga buaina hmun erawh a zual zel tih a hrilh.

Kum 2015 aṭang khan Yemen-ah hian tualchhung indona a thleng reng a, Houthi helte chuan an ram hmarlam hmun tam zawk, an khawpui Sanaa telin an thunun a, president Abd-Rabbu Mansour Hadi pawh an ram chhim lamah a tlanchhiat phah a ni. Hemi hnu hian Saudi Arabia ramah a tlanchhe zui leh bawk.

Houthi helte bei a, President Hadi kuta thuneihna pek leh a nih theihna atan, Saudi Arabia kaihhruai Arab ṭangrual ramte chuan kum 2015, March thla aṭang khan Houthi helte hi an bei let a, US-in a thlawp bawk a ni. Hemi hnu hian tualchhung indona hi a thleng zui reng a ni.

UN chuan kumin January thla khan inbeihna hrang hrang avangin civil mi 650 chuang an thi tih sawiin, hei hi thla khat chhunga civil mi thihna thlen tam ber ṭum a ni. UN chuan Yemen tualchhung indona chuan mipuite dinhmun harsatna lian ber a thlen mek tih sawiin, mipuite chhawmdawlna hna thawktu, agency hrang hrangte chuan sum pawh an tlachham ṭan tawh a ni, a ti.

Kum 2021 khan Yemen hian chhawmdawlna, USD tld 2.27 a dawng a, kum 2015 hnua a dawn tlem ber ṭum anih thu UN humanitarian office chuan a sawi. Kumin atana mipuite chhawmdawlna tura sum mamawh zat hi UN hian a la sawi lang lo.

UN World Food Programme chuan an fund dawn a tlakhniam avangin Yemen mipui maktaduai riatte hnena chaw a sem pawh December thla khan a titlem tawh a, March thla aṭang chuan chaw emaw, ei tur dang emaw semna tur a awm tawh lo maithei tih a sawi.