Ottawa Police hotu Peter Sloly a bang

Canada khawpui, Ottawa-a truck khalhtuten Covid kaihhruaina dan siam duh loha hun rei tak nawrh an huaihawt leh, nawrh huaihawtin mipui nungphung nasa taka a tikhaihlak avanga sawisel hlawh tak, Ottawa Police Service hotu Peter Sloly chu Thawhlehni khan a bang.

Nawrh huaihawtte hi Ottawa khawpui lailiah ni 19 zet an inkulh tawh a, traffic an tihbuai bakah mipui nunphung pawh a tibuai hle a ni.

Prime minister Justin Trudeau chuan Thawhṭanni khan nawrh huaihawtte hnawtdarh an nih theihna leh, khawpui chhunga nunphung a pangngai leh theihna atan sorkar hnena thuneihna sang zawk pekna, Emergencies Act a lo puang tawh bawk.

Hun rei tak khawpui chhunga nawrh huaihawt a, mi tam tak harsatna a thlen chungchangah police hotu, Peter Sloly hian sawisel a hlawh phah hle. Hei vang hian Thawhlehni khan police hotu a nihna aṭanga a ban thu hi puangin Sloly chuan, "Rilru na tak chungin ka bang ta a ni. Nawrh huaihawt tirh aṭang khan ka theihtawpin khawpui himna tur leh, nawrh tihtawpa nih theihna turin hma ka la ve a ni," a ti.

Canadian men's soccer player hlui, Sloly hian kum 2019 khan Ottawa Police Service hi a zawm a, a contract hi kum 2024-ah tawp tur a ni. Police hotu a nih chhung hian a hnathawhna kawngah fak a hlawh hle a, police leh mipuite inkarah boruak ṭha leh inpawhtawnna ṭha tak pawh a siam a ni. Mahse tun ṭuma truck khalhtute, Freedom Convoy tih hminga khawpui chhunga nawrh an huaihawtah hian, nawrh titawp turin Sloly hian hma a la ṭha tawk lo niin sawiseltu lam chuan an sawi a ni.