Europe ramten Covid khuahkhirhna thlahdul zel

Europe ram ṭhenkhat chuan Covid-19 hri kai la pung zel mah se khuahkhirhna an siamte an thlahdul zel.

France chuan Nilaini zan aṭang khan thla thum chhung a lo khar tir tawh nightclub-te pawh hawn a phalsak a, Netherlands pawhin kar leh Zirtawpni aṭang chuan nunphung pangngai angin an kal thei tawh dawn tih an sawi.

Germany chuan March 4 aṭangin pawn lamah punkhawmnaa tel thei chin chu mi 25,000-ah a tipung dawn a, vaccine dose hniha la tawh, negative Covid test report emaw nei tan nightclub pawh hawn a phalsak tawh dawn a ni. Vaccine la lote pawh negative test report an neih chuan restaurant-ah kal phalsak an ni tawh bawk ang. March 20 aṭanga in lama hnathawh chu tihtawp a ni tawh dawn a ni.

Switzerland leh Austria chuan an ramah hri la darh mek mah se Covid-19 khuahkhirhna dan an siamte hlih deuh vek an tum tawh bawk. Switzerland-ah chuan Covid positive-te in lama ni nga chhung inkhung hrang tur leh, public transport-ah face mask hmang vek tura tihna dan chu la hman a ni a, mahse heng pawh hi March thlaah chuan titawp an tum tawh. Hnathawhna hmuna mask vuah vek tura thupek siamte, dawr, restaurant, cultural venue leh thil tihkhawmna hmuna kal turte tan mask vuah leh Covid certificate phutna pawh tihtawp a ni dawn tih sorkar thuchhuah chuan a tarlang.

Austria Chancellor Karwl Nehammer pawhin March 5 aṭangin sorkar chuan khuahkhirhna a siam hrang hrangte chu a hlip dawn tih a sawi. Public transport leh ei tur zawrhna dawra mask vuah tur tih leh, hospital lut turte tana kaihhruaina a siamte chauh chu hman zui a ni tawh dawn a ni, a ti.

France chuan February 28 aṭangin indoor-a face mask vuah leh, restaurant, cinema leh gym-a vaccine pass a phutnate chu tihtawp a tum bawk. Health minister Olivier Veran chuan hri kai an tlahniam zel a nih chuan mask vuah leh vaccine pass siamte chu March thla laihawlah chuan tihtawp vek a ni tawh dawn niin a sawi.

England, Sweden leh Denmark-te pawhin hri kai, damdawi-ina dah ngaite an tlakhniam avangin Inrinni aṭang khan khuahkhirhna an siam hrang hrangte an lo an hlip tawh bawk.