Brazil-a leitawlh vangin mi 100 dawn thi tawh

Brazil-a Petrópolis khuaa lei tawlh leh tuilian thleng vangin mi 100 dawn an thi tawh tih official-te chuan an sawi.

Petrópolis khawpui hi Rio de Janeiro hmar lam tlanga awm niin, ruah sur nasa tak vanga lei tawlh leh tuilian chuan in leh motor tam tak a tichhia a ni. Chhanchhuah hna thawktute chuan leitawlhna hmunah hian chhanchhuah hna an thawk nghal a, mi 24 chu nungdama chhanchhuakin, mi 94 erawh an thi tih Natoinal Civil Defence chuan a sawi.

"Kan dinhmun chu indona ang mai a ni. Thirbanah car-te an inkhai a, car tam tak letin, chirh leh tui nen kan la awm a ni," tiin Rio de Janeiro Governor Claudio Castro chuan a sawi. Mi 35 te chu chin hriat lohin an la awm mek a, mi bo zawn hna chu chhun zan zawma kalpui a ni ang, a ti.

Petrópolis hi Rio de Janeiro tlang sang lama khualzin hiptu ber pakhat a nih bakah kum zabi 19-na hun laia Brazil lalten nipui chawlh an hmanna hmun a ni. Mahse khaw chhungah darkar khat chhung lekin thla khat chuang zet ruahtla an dawn ṭhin tluk zet a sur hman avangin hmun tam tak a tichhia a, leitawlhin chenna in 80 chuang a tichhe bawk.

Mi 300 vel bawr chu school leh hmun dangah awm lailawk tir an ni a, heng mite mamawh pe tur hian mipuite ngen an ni. Khawpui mayor chuan chhiatna rapthlak tak an tawh avang hian state of emergency a puang tawh a, Russia rama official thila zin mek president Jair Bolsonaro pawhin vanduaina tawkte tan ṭanpuina kawng a dap nghal tur thu a sawi.

Petrópolis leh a chhehvel bialah hian kum 2011 January thla khan tuilian leh leitawlh vangin mi 900 chuang an lo thi tawh bawk a ni.