Russia-in a sipaite a hnukdawk nia sawi hi a dik lo : US

Russia-in Ukraine ramria a sipaite a hnukdawk nia a sawi chu US senior official chuan thu dik lo niin a sawi ve thung.

US official chuan Ukraine ramri aṭangin Russia hian a sipaite hi a dah bo lo a, tunhnaiah sipai 7,000 vel zet a dah belh leh zawk niin a sawi. Russia chuan chhuanlam ṭha tak siamin eng tik hunah pawh Ukraine hi a run theih reng thu a sawi.

Nilaini khan Russia chuan military drill zawhfel a nih tak avangin Ukraine ramria sipaite chu hnuhdawk an nih thu a sawi a, defence ministry chuan Crimea aṭanga sipaite leh tank kalchhuak lai video-te pawh a dah chhuak a ni.

Mahse khawthlang ram official-te chuan Russia thusawi hi finfiahna tak a awm lo niin an sawi thung a, Nilaini thleng khan Ukraine ramriah hian Russia sipaite hi an la thlen belh zel zawk a ni,an ti.

Ukraine president Volodymyr Zelensky pawhin an ramri aṭangin Russia sipaite an kalsawn tih chu a thu an hre ringawt a, a takin an hmu lo tih a sawi bawk.