Russia-in Moscow aṭangin American official hnawtchhuak

Ukraine chungchanga Russia leh US inepna kal zelah, Russia chuan Moscow-a US official No 2. Bart Gorman chu a hnawtchhuak tih State Department chuan Ningani khan a tarlang.

Russia foreign ministry chuan US-in chhan mumal nei loa an ram aṭanga Russia senior official a hnawhchhuah avangin a chhanletna atan Gorman hi Moscow chhuahsan tura hriattir a ni tih a sawi ve thung a, US chu 'visa war' chawk chhuakah a puh bawk.

Gorman hi US deputy chief of mission-in a awm a, kar hmasa khan Russia hi a chhuahsan tawh nia sawi a ni. Hetih lai hian Ningania hnawhchhuah a nih thu an puan chhuah chauh chhan erawh sawichian a ni lo.

State department thupuangtu chuan, "Kan DCM chungah Russia thiltih dan hi a huatthlalawm hle a, hei hi ram pahnih inkar boruak tichhezualtuah kan ngai a,kan chhan let dan tur pawh kan ngaihtuah mek a ni," a ti. Gorman chuan valid visa a nei a, Russia-ah hian kum thum a la awm tling lo deuh tih a sawi bawk.

Ram pahnihte hi Ukraine chungchanga an inep mek bakah, an ram khawpuia palaite dah chungchangah pawh an boruak a ṭha lo mek a ni. US chuan an rama Russia palai, kum thum chuang awm tawhte chu chhuak vek turin a ti a ni. Russia chuan hei hi chhang letin, Moscow-a US palai, kum thum la awm tling lo pawh chhuak turin a ti ve nghal a, he an thiltih dan hi a dik lo niin US chuan a sawi. Mahse Russia lam chuan awmze nei loa US-in Washington-a Russia embassy-a minister-counselor a hnawhchhuah chhanletna a nih thu a sawi thung.