Hong Kong-ah Covid-19 kai inkhunghranna tur Hotel room 20,000 chuang ruahman

Hong Kong-a Covid-19 hri kai pung zel vangin, hri kaite inkhunghranna turin hotel room 20,000 chuangte an buatsaih tih an hruaitu Carrie Lam chuan nimin khan a sawi.

Hong Kong-a quarantine facility-te chu a khat titih tawh bakah damdawi-in khum 90% vel chu luahkhah a ni a, damlo ṭhenkhatte, kum upa zawkte pawh telin khum an inchan loh avangin hopsital pawn lamah, khawvawt leh ruahsur hnuaiahte an awm a ngai a ni.

Thuneitute chuan tun thla chhung ringawtin hri kai thar chu a let 60 vela a pun belh thu an sawi. China president Xi Jinping pawhin Hong Kong hmalakna ber tur chu hri darh tur ven leh khuakhirhna siam a nih thu pawh a lo sawi tawh bawk. Hri kaite chak zawka hmuh chhuah an nih theihna tura test tam zawk neihna turin, Ningani khan China aṭangin Hong Kong-ah mobile testing vehicle eng emaw zat an thleng.

Hri kaite inkhunghranna tura hotel room tam zawk ruahman chungchangah, CK Asset Holdings neitu, billionaire Li Ka-shing chuan an hotel pali-a room 3,000 chuang an dah theih tur thu a sawi. Sun Hung Kai Properties (SHKP) pawh'n room 1,000 an dah dawn tih a sawi.

New World Development (0017.HK) chuan room 700 vel an ruahman thu sawiin, Henderson Land Development (0012.HK) dintu Lee chhungkua chuan kum upa lamte tan epidemic materials leina tur HK$10 million ($1.3 million)-an thawh bawk a ni.