Canada police-ten trucker hruaitu 2 an man

Canada police-te chuan an ram khawpui, Ottawa-a Covid-19 kaihhruaina dan siam duh lo hun rei tak nawrh huaihawt, truck khalhtu zinga an hotu pahnih, Chris Barber leh Tamra Lich-te chu Ningani zan khan an man a, thubuai an siamsak dawn nia sawi a ni.

Truck khalhtute nawrh vang hian Ottawa khawpui nungphung pawh a khaihlak nasa hman hle a, a ṭum khatna atan prime minister Justin Trudeau pawhin emergency law a lo puan phah tawh bawk.

Khawpui chhunga lungawi lohna lantirnaah hian truck lian 400 bakah motor dang eng emaw chu Parliament bul kawngah an inkhuar a ni. Thuneitute chuan kalsawn tura hriattirin, an awm luih zel chuan an truck mansak bakah, an insurance tihtawp a, an bank account khawih chet theih loha hrek sakah an vau.

Police-te chuan nawrh huaihawta awmkhawmte hnawhdarh hmain, an zinga naupang awmte hruaichhuah an nih dan tur chu child-welfare agency-te nen an ngaihtuah mek tih an sawi. Kar liamta kartawp khan US ramri bula kawng an dan chu thuneitute hian an lo thianfai tawh a ni. Border crossing-a trucker-te nawrh an buatsaih chu tunkarah tihtawp a ni tawh bawk.