Myanmar inthlanpui result kimchang puan a ni

Myanmar ram inthlan­pui, November 8-a neih taka result kimchang chu nimin zing khan Union Election Commission (UEC) chuan a tichhuak ta a, rorellai Aung San Suu Kyi kaihhruai National League for Democracy (NLD) chu hneh taka thlan tlin nawn leh niin,  inthlan neihna seat 1,117 aṭangin seat 920-ah hnehna a chang. 

Inthlanpui hi Parliament in hnih, House of Lower Repre­sentative (Lower House)-a seat 315 leh House of Nationalities (Upper Houes)-a seat 161 bakah, Regional/ State Parliament-a seat 612 leh Regional/ State Par­liament-a ethnic minority seat 29-ah neih a ni. 

UEC-in nimina final result a tihchhuahah, NLD hian Lower House-a seat 258, Upper House-a seat 138, Regional/State Parliament-a seat 501 leh ethnic minority seat 23-ah hnehna a chang a ni. 

Sipai thlawp,  Union Solidarity and Development Party (USDP) chuan inthlanpuiah hian candi­date 1,089 neiin,  Parliament level thumah hian seat 71 a la. Lower House-ah seat 26, Upper House-ah seat sarih leh, Regional/State Parliament-ah seat 38 a la a ni. 

President U Win Myint leh State Counsellor Suu Kyi-te chu Lower House member atan thlan tlin leh an ni a, vice president Henry Van Thio chu Upper House member atan thlan tlin a ni thung. 

November 8-a inthlanpui an neih hi kum 2008-a ram danpui siam thar a nih hnua inthlanpui an neih ṭum thumna a ni. An ram danpui hnuaiah, Parliament term thar hnuaia session hmasa ber hi inthlanpui neih a nih aṭanga ni 90 chhunga neih tur a ni.