Egypt-in Kristian biak-in beitu mi 17 thi tura hremna pe

Egypt military court chuan kum 2017-a Egyptian Coptic Kristian biak-ina bomb tihpuahnaa inhnamhnawih mi 17 te chu Ningani khan an chungthu ngaihtuahin, thi tura hremna a pe.

State news agency Mena chuan kum 2016 leh 2017-a Coptic biak-in beihnaa inhnamhnawiha puh midang 19 chu damchhung tang turin a hrem a, mi pakua chu kum 15 tang turin a hrem bawk. Islamic State (IS) firfiak pawl chuan mi tam tak thihna thlenna, biak-in beitute hi an mi leh sate niin an lo sawi tawh a ni.

Amnesty International chuan military court-in tihhlum tura hremna a pek chu a sawisel a, pawikhawihtute chu an thiltihsual man pek ngei an ngai a, hemi rual hian thi tura hremna inpek chu a dik lo niin a sawi. Hei hian pawikhawihna thleng zel tur a dan phah dawn lo niin a sawi. Biak-in beitute chungthu chu military court-ah ni loin civilian court-ah ngaihtuah zawk tura an duh thu a sawi bawk.

Kum 2014 aṭang khan Egypt thuneitute chuan civil mi 15,000 thubuai chu miltary court-ah a ngaihtuah a, hei hi activist-te chuan an duh lo hle.

Kum 2017 April, Palm Sunday ni khan IS firfiakte chuan Alexandria leh Tana khuaa Coptic Kristian biak-in chu bomb hmangin an bei a, mi 45 an thi a ni. Kum 2016 December thla han Cairo-ah cathedral complex beih a ni bawk a, mi 25 an thi.

Egypt ramah Coptic Kristian hi an ram mipui awm zat aṭanga 10% vel an tling a, Muslim tamna ramah enhran an hlawh bik niin an sawi a, IS firfiakte beih pawh an tawk fo a ni.