US-ah Hurricane Michael tlehin chhiatna thlen nasa

US-a thlipui, Hurricane Michael tlehin Florida tuipui kamah chhiatna a thlen nasa hle.

Florida state governor Rick Scott chuan thlipui tleh vang hian chhungkaw tam takin an in leh thilneihte an chan tih a sawi. Thlipui hian chenna in tam tak a len thluk bakah thingkungte leh power line te pawh a tichhia a ni.

Hurricane Michael hi darkar khata mel 155-a naa tlehin Florida hi a nuai a, US ram laili laia thlipui tleh zinga na ber pawl a ni. Thlipui tlehin chhiatna a thlenah hian mi paruk an thi nghe nghe. Thlipui tleh dawn vang hian Florida-a mi 370,000 chuang chu hmun him lamah insaseng tura hriattir lawk an ni a, mahse tam tak chuan warning hi an ngai pawimawh lo a ni. Governor Scott chuan thlipui tuartute chhanchhuah hna hi US Coast Guard ten an thawk a, mi 27 chhanchhuah an nih thu a sawi.

Thlipui hian Florida aṭangin hmarchhak lam Georgia a pan a, mahse a tleh nat lam hi darkar khata mel 50-ah a tlahniam tawh a ni. Florida, Alabama, Georgia leh North Carolina-ahte chuan state of emergency puan nghal a ni.