Romania Covid-19 damdawi-in kangah mi 10 an thi
Romania agency for emergency situations (ISU) chuan thuchhuah an siamah Inrinni khan an rama Covid-19 kai enkawlna damdawi-in pakhat chu kangin mi 10 an thi tih an tarlang.
Damdawi-in kang hi Piatra Neamt county-a mi niin intensive care unit (ICU) aṭanga kangmei chhuak a nih thu an tarlang a, kangmei chhuah chhan erawh an la hre lo thung.
Mi 10 an thih bakah hian midang pasarih an hliam bawk a, an dinhmun a ṭha lo hle nia tarlangin hliam zingah hian doctor pawh a tel a ni.
Prosecutor-te chuan kangmei chhuah chhan hi chhui chian mek a nih thu sawiin Health Minister Nelu Tataru chuan damdawi-ina enkawl mek Covid-19 kai mi paruk dam chhuakte chu Iasi khawpuia damdawi-in lamah sawn an nih dawn thu a sawi.