Philippines-a thlipui tleh vangin mi 67 an thi
Philippines national disaster management agency chuan an rama thlipui Typhoon Vamco tleh vangin mi 67 an thih tawh thu leh, chin hriat loha mi 12 an awm mek thu nimin khan a tarlang.
Tuguegarao province-a Cagayan Valley region-a thlipuiin a nuaina hmun te tlawh turin Philippines president Rodrigo Duterte chu a zin dawn a, he bial hi thlipuiin a nuai hnu hian tuilian nasa tak a thleng zui bawk a ni. Chhiatna thleng vanga an bial chhunga thi zat hi mi 20 an tling tawh.
Luzon province-ah thlipui tlehin chhiatna a thlen vanga thi hi mi 17 an awm tawh a, metropolitan Manila-ah hian mi pariat an thi tawh bawk a, region pahnihah mi 20 an thi tawh bawk tih disaster agency thupuangtu Mark Timbal chuan a sawi. Luzon province hi Typhoon Vamco-in a nuai nasat berna province a ni.
President Duterte chuan kar liam ta Inrinni khan an rama thlipuiin a nuaina hmunah chuan inter-agency task force dah an nih dawn thu a sawi. Typhoon Vamco hi kumina Philippines-a thlipui tleh ṭum 21-na a ni.
Cagayan-a chengte hian thlipui tleh vang hian harsatna an tawk nasa hle a, helai biala cheng mi maktaduai 1.2-te buh hmunte chu tuiin a chim pilsak a ni.
Philippines-a thlipui tleh vang hian harsatna hrang hrang a awm phah a, mi tam tak ten an chenna inte chhuahsanin, an ei leh barah te pawh harsatna an tawh phah a ni.