Ottawa police-te'n nawrh huaihawtte an hnawtdarh

Canada khawpui Ottawa-a trucker-te kaihhruai, Freedom Convoy tih hmanga Covid-19 kaihhruaina dan duh lohna lantira nawrh huaihawtte chu police-ten an hnawtdarh ta.

Kar thum chhung zet chu Parlia­ment kawtah lungawi lohna lantir hian an inkhuar tawh a, mahse police-te chuan Zirtawpni leh Inrinni khan pungkhawmte hnawhdarh hna hi an thawk a ni.

Police-te chuan Ottawa-a nawrh huaihawt titawp tura an hmalakna chu kalpui zel an tum tih an sawi a, Parliament Hill leh a chhehvela awm­khawmte chu thenfai vek an tum tih an sawi. Hei hi Canada chanchina police-ten nawrh huaihawtte laka beihpui an thlakna lian ber a ni. "Tawpsan mai kan tum lo. A tawp thlengin kan bei zel dawn a ni," tiin interim police chief Steve Bell chuan a sawi.

Nawrh huaihawtte hnawhdarhna atan hian police-te chuan pepper spray pawh an hmang tih an sawi. An mi mante zingah body armour hmanga inthuam te, halpuah leh smoke grenade paite an awm thu an sawi. Nawrh huaihawt zinga ṭhenkhatin an awmkhawmna hmuna naupangte an hruai tel chu police-te chuan sawiselin, dan phalloha nawrh hauihawtna hmuna naupang hruaitute chu kum nga thleng lung-in tantir emaw, pawisa chawitir emaw theih an nih thu an sawi a ni.

Ottawa police-te hian Ningani liam ta khan nawrh hauihawtna pui ber hmun leh, khawpui chhunga sumdawnna leh chenna bial chhungah nawrh huaihawtte an luh belh theih lohna turin check-point 100 dawn an lo siam tawh bawk.

Canada sorkarin US-Canada border kaltlang, trucker-te chu Covid-19 vaccine lak vek tur tia dan a siam duh loin, trucker-te hian January thla aṭang khan lungawi lohna hi an lantir a, an ram chhung hmun hrang hrangah thlawptu tam tak an awm a ni. Trucker-te hian ramrite pawh an dang bawk a, mahse Canada sorkar chuan kar liam ta khan US-a Michigan state nena an inkara lei (bridge) an dan chu a thianfai a, hemi hnu kartawp khan trucker-te hian Coutts, Alberta, Surrey, British Columbia, leh Emerson, Manitoba-a border crossing an dan chu an titawp zui ve leh bawk.