Russia-in Ukraine a bei thei reng : White House

Russia chuan kar liam ta Inrinni khan Ukraine ramri hnaihah nuclear force exercise a nei niin US chuan a puh a, hei vang hian White House chuan eng hunah pawh Ukraine chu Russia-in a bei thei reng tawh tih a sawi.

Kar liam ta Inrinni khan US president national security-te chuan an ram president Joe Biden hnenah Russia awm dan an thlithlai dante hrilhin, he hunah hian security team-te chuan Ukraine chu eng hunah pawh Russia-in a bei thei reng tawh tih an hrilh. Hemi avang hian Biden chuan nimin (Pathianni) khan top adviser-te nen an ramin hma a lak dan tur rel an tum.

G7 ram foreign minister-te chuan Russia-in Ukraine beih a tum chungchangah engmah finfiahna an neih loh thu an sawi thung. Russia pawhin Ukraine ramria a sipai dahte a tihtlem tawh thu a sawi tawh bawk.

Hetih lai hian Ukraine sipaite chuan kar liam ta Inrinni khan an sipai pahnih, Russia thlawp separatist-ten an thah thu an tarlang.

US vice president Kamla Haris chuan, Russia-in Ukraine a run chuan US leh a thawhpuite chuan Russia chu economy-ah an hrek dawn tih a sawi.