Al Qaida hotu sang ber pahnihna that

Al Qaida firfiak pawl hotu sang ber pahnihna, Abdullah Ahmed Abdullah chu August thla khan US thlawp, Israel agent (operative) ten Iran-ah an that tih kar liam ta Zirtawpni khan New York Times chuan an tarlang.

Abdullah Ahmed Abdullah hi Abu Mohammed al-Masri tia hriat a ni bawk a, August 7 khan Iran khawpui Tehran-ah Masri hian a car khalh chhuakin, a fanu a phur a, Israel agent-ten an kap hlum zui ta niin New York Times chuan a tarlang a, a fanu pawh hi kahhlum a nih thu pawh a tarlang bawk.

He thihna thleng chungchang hi Iran chuan thudik lo a nih thu a tarlang thung a, Iran foreign ministry thupuangtu Saeed Khatibzadeh chuan US leh Israel ram chuan a changa thudik tawk lo puanzar an neih fo ṭhin thu a sawi. He thihna thleng chungchangah hian Iran chanchinbu ṭhenkhat chuan Hezbollah helpawlte nena inzawmna nei, Habib Dawood leh a fanu chu thah a nih thu an tarlang thung. 

Kum 1998 August 7 khan Africa rama US embassy pahniha bomb tipuaktu zinga mawhphurtu berah US chuan Masri hi a puh a, hei vang hian FBI chuan 'Most Wanted Terrorist' list-ah an telh a ni. Africa rama Kenya-a US embassy leh Tanzania-a US embassy chu firfiakte chuan thihchilh bomb hmangin an bei a ni. He pawikhawihna thlengah hian mi 224 an thi a, mi 100 chuang an hliam bawk.