Armenia PM thah tum nia puh NSS director hlui man

Armenia rama top intelligence agent, National Security Service (NSS)-te chuan kar liam ta Inrinni khan an ram prime minister Nikol Pashinyan thah tum nia puh, NSS director hlui Artur Vanetsyan chu an man.

NSS ten Artur Vanetsyan an man rual hian an ram PM thah tuma puh midang pahnih pawh an man tel. Artur hi NSS director a nih lai kum 2018-2019 inkar khan midangte nen inthurualin PM hi thah an tum niin NSS chuan  thuchhuah a siamah chuan a tarlang a, midangte nen hian an thuneihna hmangsuala puh an nih bakah heng mi pathumte hian PM thlaktu tur hi an sawiho thu NSS chuan a tarlang bawk.

Kar liam ta Inrinni khan NSS chuan an director hlui Artur Vanetsyan, Republican Party hotu hlui Vahram Baghdasaryan leh war volunteer Ashot Minasyan chu an ram PM thah tuma phiarrua puh an nih vanga man an nih thu hi a puang a ni. 

Armenia PM Nikol Pashinyan hian tun hnaiah hun harsa tak a tawng chho a, an ram leh Azerbaijan ramin Nagorno-Karabakh an inchuh chungchangah inkahhai a nih theih nan Russia telin inremna an ziak a, he inremna hi Armenia mite chuan an duh lo a ni. Hei vang hian Pashinyan chuan inremna an ziah hnuah pawh  na a tih thu leh an ram mite tan pawh na a tih thu a sawi chhuah phah hial.  

Inremna an ziahah hian Nagorno-Karabakh hmun hi  Azerbaijan chuan a thunun zui dawn a, hei vang hian Armenia mite chu an lungawi lo a ni. Nagorno-Karabakh inchuh hian ram pahnihte hi hun rei tak aṭangin an lo intibuai tawh a, kumin September thla aṭang khan inbei thar lehin, an inbeihnaah hian civil mi tam tak an thi tawh a, mi sang tel chu hmun him lamah an tlanchhe tawh bawk. An ram inchuh, Nagorno-Karabakh hi khawvelin Azerbaijan rama a pawm ni mah se, he biala cheng tam ber hi Armenia hnam an ni. 

Russia chuan boruak ṭha lo awm tur veng turin Nagorno-Karabakh bialah sipai 2,000 a dah dawn a ni.