Israel-in Gaza Strip an bei leh
Israel sipaite chuan Gaza Strip-a Hamas awmna hmun chu Pathianni zingah khan an bei tih tarlangin firfiakte'n Palestinian ram chhung aṭanga rocket hmanga an ram beih anih vanga bei let an nih thu an tarlang tel bawk.
Israel sipai thupuangtu chuan thuchhuah siamin fighter jet, attack helicopter leh tank hmangtein Hames hmun leh sipai post-te an nei tih a tarlang a, hei hi Inrinni zana an ram rocket pahnih hmanga beih an chhanletna a nih thu a sawi. Rocket pahnihte chu hmun zawl zau laiah a tla tih sawiin pakhat chu an rama Ashdod khawpui hmar lamah a tlak thu leh pakhat erawh chu Tek Avic chhim lama khawpui awm Rishon LeTsion bulah a tlak thu a sawi.
Nimina inbeihnaah hian ram lehlam lehlam hian thi leh hliam an report lo ve ve a, Gaza-a firfiak pawl zingah Israel rocket hmanga kahnaah hian mawhphurtu nia inchhal an la awm lo bawk.
Gaza-ah hian firfiak pawl hrang hrang awm mah se Israel hi chuan Islamist Palestinian group Hamas-te hi an do ber a, an ram beihna hrang hrangah pawh mawhphurtu berah Hamas hi an puh fo a ni.
Inrinni zana rocket hmanga beih an nih chungchang leh nimin zing lama an beihlet chungchang hi Israel Defense Forces (IDF) pawhin twitter-ah an tarlang bawk a, boruak awmdan chu ngun taka an thlir reng thu leh firfiak beihna reng reng chu chhanleta beihpui thlak nghal zel tura an inbuatsaih thu an tarlang bawk.