Turkey-in US pastor chhuah zalen ta ; White House-ah President Trump a ṭawngtai

Turkey chuan kum hnih chuang zet a lo tantir tawh US pastor Andrew Brunson chu kar kalta Zirtawpni khan a chhuah zalen ta.

Pastor Andrew Brunson hi kum 2016-a Turkey sorkar paihthlak tuma beitua puh, Gulenist movement leh sorkar dodaltu political group dangte nena inzawmna neia puhin kum 2016 October thla khan man a ni. Zirtawpni khan Turkish court chuan Brunson hi kum thum jail tang turin a hrem a, mahse jail-a hun a lo hman tawhte chhiar tel a nih tak avangin a chhuah zalen ta zawk a, Turkey ram pawna zinchhuah khapsak a nihna pawh a hlihsak bawk a ni. Court chuan enthlatua puhna thubuai dang siamsak chu a titawp nghal bawk.

Andrew Brunson hi a nupui leh a fate pathum nen kum 20 chuang Turkey ramah hian a cheng tawh a, Izmir Resurrection Church a enkawl a ni. Kum 2016-ah man a nih hnuan, kumin July thla khan a hriselna ṭhat loh avangin jail aṭanga chhuah a ni a, house arrest-a hren zui a ni.

US chuan Pastor Brunson chhuah tur hian Turkey sorkar chu a nawr fo a, July thlaa house arrest-a hren chhunzawm leh a nih avang hian Turkey justice leh interior minister-te hrekna tur chu US hian a siam phah a ni. Brunson leh US official-te chuan Turkey sorkarin Brunson a puhnate hi thu dik lo vek niin an sawi.

Chhuah zalen a nih hnuah Zirtawpni vek khan Pastor Brunson hian Turkey aṭangin Germany-a US base a pan a, heta ṭang hian Maryland-a Andrews Air Force Base-ah a thlawk lut leh a ni. Inrinni khan White House-ah President Donald Trump hmuin, chhuah zalen a nih theihna atana an hmalakna avangin lawmthu a hrilh a, Oval Office-ah hian ṭhingṭhiin President Trump chu a ṭawngṭaisak nghal bawk a ni.

President Trump chuan Pastor Brunson a zalen theihna atana an hmalakna a puih avangin Turkey President Recep Tayyop Edrogan chu lawmthu a hrilh. US chuan Brunson chhuah a nih theih nan han theihtawpin an bei tih a sawi a, Brunson-a hnenah a chakna leh rinna chuan an ram mipuite thinlung chu a nghawr a ni, tiin a hrilh bawk.

Trump chuan pastor chhuah zalen a ni ta chu Turkey nena inlaichinna ṭha tak nei tura hmalakna pawimawh tak a ni tih a sawi. Hemi rual hian hemi atan hian Turkey nen inremna an siam lo tih a sawi bawk a, mahse Turkey hrekna an hman mek chu an ngaihtuah ṭha dawn tih a sawi. Pastor chhuah zalen chuan US-in Turkey a ngaihdan pawh a thlak danglam phah hle a ni, a ti.