Malaysia Dy PM hluiin by-election ah hnehna chang

Malaysia deputy Prime Minister hlui Anwar Ibrahim chu Inrinni-a by-election neihah chakin, parliament member a ni leh dawn ta. Vawiinah hian parliament member atan lakluh a ni ang.

Election commission-in result a tihchhuahah, Anwar Ibrahim hian vote tla aṭangin 70% chuang a hmu phak a ni. Anwar chuan a hnehna chan chuan mipuiten Prime Minister Mahathir Mhamad kaihhruai sorakr an rintawkzia an tilang a ni, a ti.

Kum 71 mi, Anwar hi mahni anpui kawpa puhin thiam loh chantir a lo ni tawh a ni. Muslim ram Malaysia-ah hian anpui kawp hi khap a ni. Mahni anpui kawpa puh a nihna vang hian kum 1998 khan Anwar Ibrahim hi thiam loh chantirin kum kua tang tura hrem a ni. Mahse kum 2004 khan a hremna pek hi hlawlin Anwar hi jail aṭanga chhuah a ni. Kum 2008 khan a thawhpui mipa kawpah puh a ni leh a, 2012 khan thiam chantir a ni. Mahse kum 2014 khan Court of Appeal chuan a thubuai hi ngaihtuah ṭha lehin, kum nga tang turin a hrem.

Kumin May thla inthlanpuia PM Mahamad-a kaihhruai ṭangrual pawl, Pakatan Harapan in hnehna a chan hnuah khan Anwar-a hi ngaihdam a ni a, hemi hnu hian a party People's Justice Party president atan chuhtu awm loin thlan tlin a ni zui bawk.