UK leh US-in Saudi conference boycott maithei

Saudi journalist Jamal Khashoggi chin hriat loha a bo avangin Britain leh US chuan Saudi Arabia-a major international conference neih tur chu an boycott maithei tih sawiin, hemi chungchang hi an ngaihtuah mek a ni.

Saudi Arabia sorkar kalphung sawisel ṭhintu, journalist Khashoggi hi October 2-a Turkey-a Istanbul-a consulate a tlawh hnuah a chin hriat lohin a awm zui a ni. Turkey thuneitute chuan Saudi agent-ten an that niin an ring a, mahse Saudi Arabia chuan hei hi thu dik lo a nih thu a sawi thung.

US President Donald Trump chuan Khashoggi chunga thil dik lo tihnaa Saudi Arabia a inrawlh a nih chuan a hrem ngei dawn tih a sawi.

Journalist chin hriat loha a bo vang hian tun thlaa Riyadh-a investment conference neih tur aṭangin sponsor leh media group eng emaw zat chu an inhnukdawk tawh bawk a ni.

Turkey foreign minister Mevut Cavusoglu chuan Khashoggi awmna chin hi chhui mek a ni tih a sawi a, hemi rual hian an thil chhuinaah Saudi Arabia chuan a thawhpui ṭha lo hle tih a sawi. Cavusoglu chuan Saudi Arabia thuneitute hnenah an consulate-a Turkish official-te luh phalsak turin a ngen bawk.

Turkey thuneitute chuan Washington Post tana thawk, Khashoggi hi Istanbul-a Saudi Consulate-a a lut lai finfiahna tur audio leh video clip pawh an nei tih sawiin, consulate chhungah hian thah a nih an rin thu an sawi. Khashoggi hi document la tura kal a ni a, mahse consulate a thlen hian mi 15 awmna, Saudi agent team chuan an lo that zui nia rin a ni.